काठमाडौं । संघीय संसद् अन्तर्गतका चार संसदीय समितिहरूको बैठक आज बस्दैछन्। समितिहरूले विभिन्न महत्वपूर्ण विधेयक र नीतिगत विषयमा छलफल गर्ने कार्यक्रम तय गरेका छन्।

१. अन्तर्राष्ट्रिय सम्बन्ध र पर्यटन समिति
समितिको बैठक बिहान १० बजे बस्नेछ। बैठकमा लुम्बिनी विकास कोषको वर्तमान अवस्था, प्रगति र चुनौती लगायतका विषयमा छलफल हुने कार्यसूची रहेको छ। लुम्बिनी क्षेत्रको विकास र व्यवस्थापनमा देखिएको ढिलाइ र समस्या समाधानका उपायबारे समिति केन्द्रित हुने बताइएको छ।

२. कृषि, सहकारी तथा प्राकृतिक स्रोत समिति
यस समितिको बैठक बिहान ११ बजेका लागि तय गरिएको छ। बैठकमा ‘भूमिसम्बन्धी केही नेपाल ऐनलाई संशोधन गर्न बनेको विधेयक, २०८२’ मा दफावार छलफल गरिनेछ। भूमि सुधार, स्वामित्व तथा उपयोगसम्बन्धी कानुनी प्रावधानहरू सुधार गर्ने उद्देश्यले तयार पारिएको विधेयकमाथि व्यापक बहस हुने अपेक्षा गरिएको छ।

३. विधायन व्यवस्थापन समिति
विहान ११ बजे बस्ने अर्काे बैठक विधायन व्यवस्थापन समितिको हो। उक्त बैठकमा ‘जलस्रोत विधेयक, २०८१’ को मस्यौदाको प्रतिवेदनमाथि छलफल गरिनेछ। जलस्रोतको उपयोग, संरक्षण तथा व्यवस्थापनसँग सम्बन्धित यो विधेयकलाई आगामी दिनमा संसदमा पेश गर्नुअघि समितिले अन्तिम समीक्षा गर्ने तयारी गरेको हो।

४. सार्वजनिक नीति तथा प्रत्यायोजित विधायन समिति
दिउँसो १ बजेका लागि तय गरिएको यो समितिको बैठकमा ‘राष्ट्रिय निकुञ्जसँग सम्बन्धित प्रतिवेदन’ माथि छलफल गरिनेछ। जैविक विविधता संरक्षण, निकुञ्ज व्यवस्थापन र वातावरणीय सरोकारहरूका विषयमा समितिले गम्भीर बहस गर्ने बताइएको छ।

संघीय संसद्का यी समितिहरूले सरोकारवाला मन्त्रालयहरूका प्रतिनिधिसँग आवश्यक स्पष्टीकरण माग गर्दै, कानुनी र नीतिगत सिफारिसहरू अघि बढाउने तयारी गरेका छन्।