धुलिखेल १०, फागुन । नेकपा नेत्रविक्रम चन्द विप्लव समूहका नेता धर्मेन्द्र वास्तोलालाई सर्वोच्च अदालतले रिहा गर्न आदेश दिए लगत्तै पक्राउ गरी काभ्रे ल्याइएको छ ।

प्रहरीले सोमबार उनलाई सर्वोच्च अदालतको गेटबाटै पक्राउ गरेर जिल्ला प्रहरी कार्यालय काभ्रे ल्याएको हो । काभ्रेमा वास्तोलाविरुद्ध संगठित अपराधको मुद्दा दर्ता भएको बताइएको छ ।

सोमबार सर्वोच्च अदालतमा दर्ता भएको बन्दी प्रत्यक्षीकरण रिटमाथि सुनुवाई गर्दै न्यायाधीश मीरा खड्का र सुष्मालता माथेमाको इजलासले बास्तोलालाई रिहा गर्न आदेश दिएको थियो ।

प्रतिबन्ध नेत्रविक्रम चन्द नेतृत्वको नेकपासँग सरकारले वार्ताको तयारी गरिरहेको बेला वास्तोला अदालतबाटै पुनः पक्राउ परेका हुन् । सरकारको नेतृत्व गरिरहेको नेकपा ओली समूह र प्रतिबन्धित विप्लव समूहबीच पार्टी एकतासम्मको कुरा चलिरहेको छ । सरकारसँग वार्ताका लागि आफूहरु सकारात्मक रहेको विप्लवले विज्ञप्तिमार्फत् जनाइसकेका छन् ।

अदालतबाट पुनः पक्राउ पर्नु अघि नेता वास्तोलाले पनि आफ्नो पार्टी वार्ताका लागि तयार रहेको तर त्यसका लागि सरकारले इमान्दारीपूर्वक प्रयास गर्नुपर्ने बताएका थिए ।