धुलिखेल, ७ जेठ :  धुलिखेल अस्पतालमा अब दैनिक कोरोना भाइरसको परीक्षण हुने भएको छ । जिल्ला संकट ब्यवस्थापन केन्द्र (सीएमसी) काभ्रेको आज बसेको बैठकले भोली देखि अस्पतालमा दैनिक परीक्षण गर्ने ब्यवस्था मिलाउने निर्णय गरेको हो ।

धुलिखेल अस्पतालमा हस्ताको दुई दिन आइतबार र बुधबार मात्रै कोरोना भाइरसको परीक्षण हुदैँ आएको थियो । सीएमसीले जिल्लामा ५० बेडको आइसोलेसन बेड बनाउने समेत निर्णय गरेको छ । हाल जिल्लामा १३ बेड मात्रै आइसोलेसन छ । संघ, प्रदेश र दातृ निकायको सहयोगमा आइसोलेसन बेड निर्माण गरिने प्रमुख जिल्ला अधिकारी एवं सीएमसीका संयोजक श्रवण कुमार तिमिल्सिनाले जानकारी दिए ।

बैठकले जिल्ला धुलिखेल र बनेपामा जिल्ला स्तरीय ३÷३ सय बेड, नगरपालिका र गाउँपालिकामा १÷१ सय बेडको क्वारेन्टाइनको संख्या बढाउने पनि निर्णय गरेको छ । भारत लगायत जिल्लाका विभिन्न ठाउँबाट आएका नागरिकलाई बनेपा र धुलिखेलको क्वारेटाइनमा राखिने भएको छ । यी दुई ठाउँका क्वारेन्टाइनमा ब्यवस्थापनका लागि प्रत्येक नगरपालिकाहरूले ५ लाख र गाउँपालिकाहरू ३ लाख रूपैयाँ एकहप्ताभित्र उपलब्ध गराउनु पर्ने निर्णय समेत बैठकले गरेको छ ।