धुलिखेल, ७ जेठः काभ्रेको दुर्गम क्षेत्रमा पर्ने चौरीदेउराली गाउँपालिकाका ९ जनामा आरडिटी विधि मार्फत गरिएको परीक्षणमा कोरोना भएको पाइएको छ । उनीहरुको बिस्तृत परीक्षणका लागि धुलिखेल अस्पताल पठाइएको पालिका स्वास्थ्य संयोजक तेज बहादुर घिसिङले जानकारी दिए ।

आरडिटी विधि मार्फत मंगलबार ३२ जनाको परीक्षण गर्दा २ जनामा कोरोना पोजेटिभ देखिएको थियो । त्यस्तै आज २७ जनाको परीक्षण गरिएकोमा थप ८ जनामा कोरोना पोजेटिभ देखिएको हो । यसरी आरडिटीमा कोरोना पोजेटिभ देखिनेमा क्वारेन्टाइनमा बसेका देखि स्वास्थ्य कर्मी र पालिकाका कर्मचारी समेत छन् ।

उनीहरुलाई एम्बुलेन्स, पालिकाको गाडी र नीजि सवारी साधन मार्फत स्वाब परीक्षणका लागि धुलिखेल अस्पताल पठाइएको स्वास्थ्य संयोजक घिसिङले जानकारी दिए । क्वारेन्टाइनमै बसेका ब्यक्तिमा समेत कोरोना पोजेटिभ देखिएको छ । वडा नम्बर ५ मा डेरा गरी बस्ने उनको ६ नम्बर वडाको देउराली बजारमा सैलुन पसल रहेको पाइएको छ । ती ब्यक्ति लकडाउनकै बेला आफ्नो घर धनुषा पुगेर बैशाख २८ गते चौरी देउराली पुगेका थिए । घर गएर फर्किएको स्थानीय थाहा पाएपछि उनलाई बैशाख ३० गतेदेखि पालिकाको क्वारेन्टाइनमा राखिएको थियो ।

यसैबीच चौरी देउराली गाउँपालिकामा कोरोना भाइरस परीक्षणका लागि आरडिटी किटको अभाव भएको छ । स्वास्थ्य कार्यालय काभ्रेले उपलब्ध गराएको ६० वटा किट सकिएको छ । स्वास्थ्य कर्मी र पालिकाकै कर्मचारीमा कोरोना भाइरस पोजेटिभ देखिएपछि अन्य जनप्रतिनिधिहरुले समेत परीक्षण गर्न माग गरेका छन् । तर किट अभावमा परीक्षण हुन नसकेको पालिकाका स्वास्थ्य स्वास्थ्य संयोजक तेज बहादुर घिसिङले बताए ।