धुलिखेल, १९ बैशाखः धुलिखेल नगरपालिकाका सबै वडाका किसानले धानको मुल बीउ नपाउने भएका छन् । किसानको माग अनुसार बजारमा नपाएपछि नगरपालिकाले किसानलाई उन्नजातको बीउ अनुदानमा दिन सुरु गरेको छ ।

यसअघि नगरपालिकाले किसानलाई खुमल-४ जातको मुल बीउ अनुदानमा दिने बताएको थियो । नगरपालिकाले १२ वटै वडाका किसानसँग मुलबीउका लागि माग आह्वान गरेको थियो । किसानको माग अनुसार बजारमा खरिद गर्न खोज्दा मुलबीउ नभेटिएपछि उन्नजातको बीउ वितरण सुरु गरेको नगरपालिकाका कृषि शाखा संयोजक मन्दिल कृष्ण श्रेष्ठले जानकारी दिए ।

नगरपालिकाले आजबाट उन्नजातका धानको बीउ वितरण सुरु गरेको हो । यो वर्ष नगरपालिकाको वडा नम्बर १२ र २ मा ४०/४० रोपनी क्षेत्रफलका लागि मात्रै खुमल-४ को मुल बीउ वितरण गरिनेछ । नगरपालिकाले वडा नम्बर ५ मा ५ सय ९५ केजी खुमल-१० र २ सय १० केजी खुमल-८ उन्नजातको धानको बीउ वितरण गरेको छ ।

त्यस्तै वडा नम्बर ४ मा ५ सय ७५ केजी खुमल-१० र १ सय ७५ केजी खुमल-८ उन्नजातको बीउ वितरण गरेको हो । अन्य वडाहरुमा पनि क्रमशः उन्नजातको धानको बीउ वितरण गर्ने कृषि शाखा संयोजक श्रेष्ठले बताए ।