धुलिखेल, १९ बैशाखः हिउँमा फसेका सिन्धुपाल्चोकको बलेफी गाउँपालिका वडा नम्बर ४ का सुरज तामाङलाई हेलिकप्टर मार्फत सकुशल उद्वार गरिएको छ । विगत १४ दिन देखि रसुवाको गोसाइँकुण्ड नजिकैको तारेभिरमा आइपुगेपछि हिउँमा फसेका लामाको शुक्रबार बिहान उद्धार गरिएको हो ।

रसुवागढी हाइड्रोपावरमा मजदुरीको काम गर्दे आएका तामाङ लकडाउन लम्बिएपछि मेलम्ची हुँदै आफ्नो घर आउन बैशाख ६ गते हिडेका थिए । उनीहरुलाई नेकपाका केन्द्रिय सदस्य माधव सापकोटा र बलेफी गाउँपालिकाका अध्यक्ष केदार क्षेत्रीले हेलिकप्टर मार्फत उद्धार गरेका हुन् ।

तामाङको स्वास्थ अबस्था सामान्य रहेकोे छ । थप स्वास्थ्य  उपचारका लागि उनलाई अहिले सिभिल अस्पतालमा राखिएको छ ।

उनलाई वैशाख १६ गते नुवाकोटको दुप्चेश्वर गाउँपालिकाको सूर्यकुण्ड फेदीभन्ने ठाउँमा स्थानीयले भेटेपछि प्रहरीलाई खबर गरेका थिए । त्यतिबेला बेहोसी अवस्थामा रहेका उनी अहिले सामान्य हिसाबले बोल्न सक्ने अवस्थामा रहेको सापकोटा बताउँछन् ।

सामान्य बोल्न सक्ने भएपछि लामाले गोठमा आइपुग्दासम्म आफूले बोकेर ल्याएको सातु खाएर बाँचेको प्रतिक्रिंया दिएका थिए । हिउँमा फसेपछि आफूले बोकेको म्याटलाई दुई टुक्रा पारेर शरीरमुनि ओछ्याउने र माथि ओड्ने गरेर पुनर्जीवन पाएको सुनाएका छन् ।