धुलिखेल, ११ बैशाखः काभ्रे जिल्लामा हालसम्म विदेशबाट फर्किएका ४६२ जनामा आरडिटी विधि मार्फत कोरोना भाइरसको परिक्षण गरिएको छ । जिल्ला स्वास्थ्य कार्यालय काभ्रेले दिएको जानकारी अनुसार जिल्लाका १३ वाटै स्थानीय तहमा विदेशबाट आएका नागरिकको आरडिटी परिक्षण गरिएको हो ।

आरडिटी परिक्षणमा मण्डनदेउपुर नगरपालिका र बेथानचोक गाउँपालिकाका १/१ जनामा कोरोना भाइरसको पोजेटिभ देखिएको थियो । बाँकीमा भने कुनै समस्या नदेखिएको जिल्ला स्वास्थ्य कार्यालय काभ्रेका प्रमुख डाक्टर नरेन्द्र कुमार झाले बताए ।

काभ्रे जिल्लाका ६० जनाको स्वाब परिक्षण गरिएको छ । स्वाब परिक्षणमा पनि कुनै ब्यक्तिमा कोरोना संक्रमण नदेखिएको डाक्टर झाले बताउनुभयो । धुलिखेल अस्पतालमा हरेक हप्ताको आइतबार र बुधबार स्वाब परिक्षण हुदैँ आएको छ । धुलिखेल अस्पतालमा हालसम्म टेकु अस्पतालबाट पठाइएका सहित ४ सय ७३ जनाको स्वाब परिक्षण गरिएको छ ।

जिल्लामा ब्यक्तिगत सुरक्षा सामग्री ८ सय ४३ थान भित्रिएको छ । त्यस्तै सर्जिकल मास्क ५१ हजार ३ सय ३५ थान र सर्जिकल गाउन ४४ थान रहेको छ । जिल्लामा ४२ सय १ बोतल सेनिटाइजर, एन–९५ मास्क २ सय १८ वटा रहेको छ ।