धुलिखेल, २८ चैतः पूर्व सुचना तथा सञ्चार प्रविधिमन्त्री गोकुल बास्कोटाले आफ्नो जिल्लामा ठूलो परिमाणको स्वास्थ्य सामग्री पठाएका छन् । मन्त्री बास्कोटाले बनेपा, धुलिखेल, पनौती, पाँचखाल, मण्डन र भकुण्डेबेशी लगायत काभ्रेका बिभिन्न अस्पताल तथा स्वास्थ्य चौकीहरुमा कार्यरत स्वास्थ्य कर्मीका लागि स्वास्थ्य सामग्री पठाएका हुन् ।

पूर्व मन्त्री बास्कोटाले जिल्लाका लागि १९५ वटा पीपीई अर्थात पर्सनल प्रोटेक्टिब इक्युपमेन्ट, २५ एमएलको २२९ पिस स्यानिटाईजर र ४ हजार थान सर्जिकल मास्क पठाएका हुन् ।

बास्कोटाले पठाएको स्वास्थ्य सामग्री शुक्रबार नै युवा बिद्यार्थीहरुले धुलिखेल नगरपालिकालाई हस्तान्तरण गरेका छन् । पूर्वमन्त्री बास्कोटाले उपलब्ध गराएको ७५ थान पीपीई, ६ सय थान मास्क तथा ७५ थान स्यानीटाईजर धुलिखेल नगरपालिका प्रमुख अशोक कुमार ब्यान्जु श्रेष्ठलाई हस्तान्तरण गरेका हुन् ।

यसैबीच धुलिखेल नगरपालिकाले बास्कोटा मार्फत प्राप्त ७५ थान पीपीई मध्ये धुलिखेल प्राथमिक स्वास्थ्य केन्द्रलाई ४१ थान हस्तान्तरण गरेको छ । बाँकी पीपीई आवश्यकताका आधारमा नगरपालिका अन्य स्वास्थ्य संस्थाहरुलाई पनि उपलब्ध गराइने नगरप्रमुख ब्यान्जुले बताए ।