धुलिखेल, २७ फागुनः पाँचखाल नगरपालिकाले अपाङ्गता भएका व्यक्तिका लागि उद्यमी बनाउन विभिन्न कार्यक्रमलाई निरन्तरता दिएको छ । पालिकाले वडा नं १० र १२ का २५ जना अपाङ्गता भएका व्यक्तिलाई मोजा, पञ्जा र टोपी बनाउने तालिम दिन सुरु गरेको हो ।

मंगलबार वडा नं १२ बालुवाको आजाद माध्यमिक विद्यालयमा सुरु भएको तालिम एक हप्तासम्म चल्ने छ । तालिमका लागि नगरपालिकाले १ लाख ३० हजार रुपैयाँ बजेट विनियोजन गरेको छ ।

नगरपालिकाले यो भन्दा अगाडी वडा नं ८, ९, ११ र १३ समेट्ने गरी २५ जनालाई यो तालिम दिइसकेको उपप्रमूख लक्ष्मी दनुवारले बताइन् । ‘हामी नगरभित्रका काम गर्न सक्ने सबैलाई कुनै न कुनै उद्यमसम्म जोड्न चाहान्छाैँ, उपप्रमुख दनुवारले भनिन्, यसैको निरन्तरता हो, अपाङ्गता भएका ब्यक्तिहरुलाई विभिन्न विभिन्न खालको तालिम दिएर उद्यमी बनाउने ।’