काठमाडौं । नेपाली कांग्रेसको १५औँ महाधिवेशनमा सभापति पदका उम्मेदवार किशोरसिंह राठौरले उम्मेदवारी फिर्ता लिएसँगै गगन थापालाई निर्विरोध सभापति बनाउने बाटो खुलेको छ।

बुधबार पत्रकार सम्मेलन गर्दै राठौरले पार्टी संकटको अवस्थामा विभाजन र प्रतिस्पर्धालाई निरन्तरता दिनुभन्दा एकताबद्ध भएर अघि बढ्नु आवश्यक रहेको भन्दै उम्मेदवारी फिर्ता लिएको घोषणा गरेका हुन्। राठौरले सभापतिका अर्का उम्मेदवार गगन थापाले अघि सारेको ‘मिलेर जाने’ प्रस्तावलाई समर्थन गर्दै आफू पछि हटेको स्पष्ट पारे। उनले व्यक्तिगत आकांक्षाभन्दा पार्टीको एकतालाई प्राथमिकता दिएको दाबी गरे। राठौरको फिर्तीसँगै कांग्रेसको सभापति निर्वाचनमा थापाको पक्षमा राजनीतिक माहोल थप अनुकूल बनेको छ। प्रतिस्पर्धाबाटै नेतृत्व चयन गर्ने अवस्थामा पुगिसकेको कांग्रेस महाधिवेशन अब थापालाई निर्विरोध सभापति बनाउने कसरततर्फ मोडिएको छ।

राठौरले कांग्रेसलाई एकताबद्ध र बलियो बनाउन आफू आगामी दिनमा पनि सक्रिय रहने बताएका छन्।