धुलिखेल, २२ माघः काभ्रेको रोशी गाउँपालिकाका सबै वडाको नयाँ भवन चालु आर्थिक वर्षभित्रै बन्ने भएको छ । अहिले नयाँ वडा भवनको शिलान्यास धमाधम भइरहेको छ । बुधबार पालिकाका अध्यक्ष डिबी लामाले वडा नम्बर १० को वाल्टीङमा बन्ने नयाँ भवनको शिलान्यास गरे । यो भवन २२ लाख लागतमा निर्माण हुने पालिकाको योजना शाखा प्रमुख राम लामाले जानकारी दिए । उनका अनुसार साढे दुई तल्ले भवन १० कोठाको बन्ने छ । यो भवन निर्माणका लागि स्थानीय शिक्षक भक्तप्रसाद मैनालीले ४ आना जग्गा दान गरेका हुन् ।

वडा ६ मा साढे दुई तल्ले नयाँ आरसीसी भवन निर्माण भइसकेको छ । २५ लाख लागतमा निर्माण भवन सञ्चालनमा भने आउन बाँकी छ । रोशी गाउँपालिकामा १२ ओटा रहेका छन् । अन्य वडामा पनि ठेक्काको प्रक्रिया अघि बढिसकेको योजना शाखा प्रमुख राम लामाले जानकारी दिए । पालिकाभित्र बन्ने सबै वडाका नयाँ भवनमा जिल्ला समन्वय समितिको ६० प्रतिशत र पालिकाको ४० प्रतिशत अनुदान बापतको रकम खर्च हुनेछ ।

सबैभन्दा कम वडा नम्बर १ को भवनमा १८ लाखको विनियोजन गरिएको छ । २, ४, ५, ७ , ८, ९ र १२ नम्बर ३१/३१ लाख रुपैयाँमा नयाँ भवन बन्ने योजना शाखा प्रमुख लामाले जानकारी दिए । ‘प्रायः वडाको ठेक्का सम्झौता पनि भइसकेका छन्, शाखा प्रमुख लामाले भने ‘यसै आर्थिक वर्षभित्र सबै वडा कार्यालयहरुले नयाँ भवनबाट सेवा प्रवाह गर्ने गरी काम भइरहेको छ ।’