भक्तपुर, १८ असार : भक्तपुरको प्रसिद्ध पाँचतले मन्दिरको गजुरमा आज बुसाँरा मनाइएको छ । हरेक वर्ष असार शुक्ल प्रतिपदाको दिन बुसाँरा अर्थात् झण्डोत्तोलन गर्ने परम्परा अनुसार आज बुसाँरा गरिएको तलेजूका मूल नाइके नरेन्द्रप्रसाद जोशीले बताउनुभयो ।

पाँचतले मन्दिर निर्माण सम्पन्न भएको उपलक्ष्यमा नेपाल संवत् ८२२ मा भूपतिन्द्र मल्लको पालादेखि यो परम्परा हरेक वर्ष चल्दै आएको उहाँले बताउनुभयो । पाँचतले मन्दिरको छाना बनाउने काम शुरुदेखि गर्दै आएका तुछिमलाका २० जना अवाल पाँच तले मन्दिरको टुप्पोमा पुगेर झण्डोत्तोलन गरेका हुन् ।

तुछिमला टोलसुधार समिति अध्यक्ष हरिशरण अवालले बुसाँराका लागि हरेक वर्ष ज्यान जोखिममा राखेर २० जना अवाल पाँचतले मन्दिरमाथि जाने गरेको बताउनुभयो । आर्थिक अभावका कारण यो परम्परा लोप हुने अवस्थामा पुगेको बताउँदै उहाँले स्थानीयवासी बसेर भोजसमेत खानुपर्ने परम्परा रहेको बताउनुभयो । यसवर्ष गुठी कार्यालयले रु १० हजार उपलब्ध गराए पनि यो रकम अपुग रहेको उनीहरुको भनाइ छ ।

टौमढी टोलका भैरवनाथ एकदम डरलाग्दो, रिसाहा र घमण्डी, आफू नै ठूलो भन्ने भैरवनाथलाई शान्त पार्र्नका लागि भैरवनाथको अगाडि सिद्धिलक्ष्मीे स्थापना गरिएको भनाइ छ । भैरवनाथ भन्दा ठूलो मन्दिर बनाएपछि भैरवनाथको रिस कम गर्न अग्लो पाँचतले मन्दिरलाई बनाइएको भनाई रहदै आएको छ । रासस