काठमाडौं । ग्लोबल आइएमई बैंक लिमिटेड डिजिटल भुक्तानी कारोबारमा उत्कृष्ट प्रदर्शन गर्दै ‘फोनपे अनर्स २०८३’ अन्तर्गत दुई विधामा सम्मानित भएको छ।

बैंकले ‘हाइएस्ट फोनपे डाइरेक्ट भोलुम (इस्युअर)’ र ‘हाइएस्ट फोनपे क्यूआर भोलुम (इस्युअर)’ विधामा अवार्ड प्राप्त गरेको हो। डिजिटल वित्तीय भुक्तानी प्रणालीको विस्तार र प्रवर्द्धनमा पुर्‍याएको योगदानको कदर गर्दै बैंकलाई सम्मान गरिएको जनाइएको छ।

बैंकको मोबाइल बैंकिङ एप ‘ग्लोबल स्मार्ट प्लस’ मार्फत अन्तरबैंक रकम स्थानान्तरण (आईबीएफटी) तथा फोनपे क्यूआर भुक्तानीमा उल्लेखनीय कारोबार गर्न सफल भएपछि यी अवार्ड प्राप्त भएको बैंकले जनाएको छ।

ग्राहकलाई सहज, सुरक्षित र भरपर्दो डिजिटल बैंकिङ सेवा उपलब्ध गराउँदै आएको बैंकले मोबाइल एपबाटै रकम स्थानान्तरण र क्यूआरमार्फत भुक्तानी गर्न सकिने सुविधा प्रदान गर्दै आएको छ।

डिजिटल कारोबारमा ग्राहकको बढ्दो सहभागिता र प्रविधिमैत्री बैंकिङ सेवाको विस्तारले यो उपलब्धि हासिल गर्न सहयोग पुगेको बैंकको भनाइ छ। बैंकले आगामी दिनमा डिजिटल रूपान्तरण, वित्तीय समावेशीकरण र नगदरहित कारोबारलाई प्रवर्द्धन गर्दै विद्युतीय भुक्तानी सेवालाई थप विस्तार गर्ने प्रतिबद्धता जनाएको छ।