काठमाडौं । एनएमबि बैंकले २४ हजार ३१२ कित्ता संस्थापक सेयर सर्वसाधारणका लागि बिक्रीमा ल्याएको छ। बैंकले बिहीबार सूचना जारी गर्दै संस्थापक सेयर खरिदका लागि खुला आवेदन आह्वान गरेको हो।

बैंकका अनुसार यसअघि संस्थापक सेयरधनीलाई प्राथमिकता दिँदै गत असार ३० गते ३५ दिने सूचना प्रकाशित गरिएको थियो। तर तोकिएको अवधिभित्र संस्थापक सेयरधनीबाट कुनै आवेदन नपरेपछि अब उक्त सेयर सर्वसाधारण तथा इच्छुक व्यक्ति र कम्पनीले खरिद गर्न सक्ने भएका छन्।

सेयर खरिद गर्न इच्छुक व्यक्ति तथा कम्पनीले सूचना प्रकाशित भएको मितिले १५ दिनभित्र आवश्यक कागजातसहित आवेदन दिनुपर्नेछ। आवेदन काठमाडौंको बबरमहलस्थित बैंकको कम्पनी सचिवको कार्यालयमा बुझाउनुपर्ने बैंकले जनाएको छ।

बैंकले संस्थापक समूहको सेयर बिक्रीका लागि तोकिएको प्रक्रिया पूरा गरेपछि अब खुला रूपमा आवेदन माग गरेको हो।

इच्छुक आवेदकले तोकिएको समयभित्र आवश्यक कागजातसहित आवेदन पेश गर्नुपर्नेछ। तोकिएको समयपछि प्राप्त हुने आवेदनका सम्बन्धमा बैंकले आफ्नो प्रक्रिया तथा प्रचलित नियमअनुसार निर्णय गर्ने जनाएको छ।