काठमाडौं । बिल काट्ने र डिजिटल भुक्तानी गर्ने ग्राहकलाई पुरस्कार जित्ने अवसरसँग जोड्दै माछापुच्छ्रे बैंकले आफ्नो एमबीएल एम–स्मार्ट मोबाइल बैंकिङ एपमा ‘बिल जितौं (आईआरडी)’ सुविधा सञ्चालनमा ल्याएको छ।

आन्तरिक राजस्व विभागले अघि बढाएको करदाता प्रोत्साहन उपहार कार्यक्रमलाई सघाउने उद्देश्यले बैंकले यो सुविधा ल्याएको जनाएको छ। यसमार्फत ग्राहकले आफूले गरेको योग्य कारोबार, कारोबारको विवरण तथा पुरस्कारका लागि योग्य भए–नभएको जानकारी मोबाइलबाटै हेर्न सक्नेछन्।

नेपालभित्र व्यक्तिगत प्रयोजनका लागि रु. १०० भन्दा बढीको वस्तु वा सेवा खरिद गरी मर्चेन्ट क्यूआरमार्फत डिजिटल भुक्तानी गर्ने ग्राहकका योग्य कारोबार स्वतः आन्तरिक राजस्व विभागको प्रणालीमा समावेश हुने व्यवस्था छ। त्यसका लागि ग्राहकले छुट्टै दर्ता गर्नुपर्ने छैन। कार्यक्रममा सहभागी योग्य कारोबारमध्ये हरेक दिन एक जनालाई कर कट्टीपछि रु. १ लाख र हरेक १५ दिनमा एक जनालाई रु. १० लाख बम्पर पुरस्कार प्रदान गरिने व्यवस्था गरिएको छ।

माछापुच्छ्रे बैंकका ग्राहकले एमबीएल एम–स्मार्टमा लगइन गरी ‘बिल जितौं’ मेनुबाट आफ्नो योग्य कारोबारको संख्या र विवरण हेर्न सक्नेछन्। पुरस्कार विजेता बनेको अवस्थामा समेत सम्बन्धित जानकारी सोही मेनुमार्फत प्राप्त गर्न सकिने बैंकले जनाएको छ। बैंकले ग्राहकलाई रु. १०० भन्दा बढीको खरिदमा मर्चेन्ट क्यूआरबाट डिजिटल भुक्तानी गर्न, प्यान/भ्याट बिल लिन र सुरक्षित राख्न आग्रह गरेको छ।

डिजिटल भुक्तानीको विस्तारसँगै कर प्रणालीमा पारदर्शिता र बिल लिने संस्कृतिलाई प्रोत्साहन गर्ने सरकारी अभियानमा सहकार्य गर्न यो सुविधा सञ्चालनमा ल्याइएको बैंकले जनाएको छ।