काठमाडौं । विद्युतीय सवारीसाधन (ईभी) खरिद गर्ने ग्राहकलाई लक्षित गर्दै एनएमबी बैंकले विशेष कर्जा योजना अघि सारेको छ। काठमाडौंमा सुरु हुन लागेको नाइमा नेपाल मोबिलिटी एक्सपो २०२६ लाई लक्षित गर्दै बैंकले नयाँ ईभीका लागि ‘ईभी अटो कर्जा’ ल्याएको हो।

बैंकका अनुसार नयाँ विद्युतीय सवारीसाधन खरिदका लागि बेस रेटमा थप ०.५ प्रतिशत ब्याजदर बाट कर्जा उपलब्ध हुनेछ। सीमित अवधिका लागि ल्याइएको यो योजनाले ईभी खरिदकर्तालाई सहज वित्तीय विकल्प उपलब्ध गराउने बैंकको दाबी छ। ईभीको प्रयोग बढाउने र वातावरणमैत्री यातायातलाई प्रोत्साहन गर्ने उद्देश्यले योजना ल्याइएको बैंकले जनाएको छ। कर्जा लिन चाहने ग्राहकका लागि प्रक्रिया समेत सरल र छिटो बनाइएको बैंकको भनाइ छ।

नयाँ ईभी खरिद गर्न चाहने ग्राहकले नाइमा मोबिलिटी एक्सपोमा रहेको एनएमबी बैंकको स्टल नम्बर ०५ बाटै कर्जासम्बन्धी जानकारी तथा आवेदन दिन सक्नेछन्। त्यसबाहेक देशभर रहेका बैंकका शाखाबाट पनि कर्जा सुविधा लिन सकिनेछ।एनएमबी बैंकले हाल देशभर १९८ शाखा, १७६ एटीएम तथा एक्सटेन्सन काउन्टरमार्फत सेवा दिँदै आएको जनाएको छ।ईभी बजारमा नयाँ मोडल र ब्रान्ड थपिँदै गएको अवस्थामा बैंकको यो योजनाले विद्युतीय सवारी खरिदकर्तालाई थप सहज हुने अपेक्षा गरिएको छ।