काठमाडौं । मनाङमा निर्माणाधीन ६५ मेगावाट क्षमताको दुध खोला जलविद्युत् आयोजनाको वित्तीय व्यवस्थापन पूरा भएको छ। आयोजनाका लागि एनएमबी बैंकको नेतृत्वमा ९ अर्ब ६७ करोड रुपैयाँ ऋण लगानी जुटाइएको हो।

करिब १२ अर्ब ९० करोड रुपैयाँ लागत अनुमान गरिएको आयोजनामा एनएमबी बैंक अगुवा तथा मुख्य लगानीकर्ता र सानिमा बैंक सह–अगुवा बैंकका रूपमा सहभागी छन्।

दुध खोला हाइड्रो पावर कम्पनीले प्रवर्द्धन गरिरहेको आयोजनामा माउन्टेन इनर्जी नेपाल र सीताराम तिमिल्सिना समूह प्रमुख लगानीकर्ताका रूपमा रहेका छन्।

ऋण सम्झौतामा एनएमबी बैंकका सहायक महाप्रबन्धक दिनेश दुलाल र कम्पनीका अध्यक्ष अरुण केसीले हस्ताक्षर गरेका छन्।

एनएमबी बैंकले जलविद्युत् क्षेत्रमा आफ्नो लगानी विस्तार गर्दै आएको जनाएको छ। बैंकका अनुसार हालसम्म ५० भन्दा बढी जलविद्युत् आयोजनामा लगानी गरिसकिएको छ।

आयोजनामा वातावरणीय तथा सामाजिक जोखिम व्यवस्थापनलाई समेत प्राथमिकता दिइएको बैंकको भनाइ छ। आयोजनाको ESG पक्षको प्रारम्भिक मूल्याङ्कन Hydropower Sustainability Alliance (HSA) को Hydro ESG Tool प्रयोग गरी गरिएको छ।