काठमाडौं । नेपाल वायुसेवा निगम (नेवानी) ले नयाँ कार्यकारी नेतृत्व पाएको छ। सरकारले निगमका सञ्चालक समिति अध्यक्ष महेश्वरभक्त श्रेष्ठलाई कार्यकारी अध्यक्ष नियुक्त गर्दै महाप्रबन्धकको जिम्मेवारीसमेत सुम्पिएको छ।

मंगलबार बसेको मन्त्रिपरिषद् बैठकले निगमको कार्यकारी नेतृत्व एउटै व्यक्तिमार्फत सञ्चालन गर्ने निर्णय गरेको हो। यससँगै श्रेष्ठले अब निगमको नीति निर्माणसँगै दैनिक प्रशासनिक र व्यवस्थापकीय कामको नेतृत्व पनि गर्नेछन्।

सरकारका प्रवक्ता तथा शिक्षामन्त्री सस्मित पोखरेलका अनुसार मन्त्रिपरिषद्ले श्रेष्ठलाई महाप्रबन्धकको कार्यसमेत गर्ने गरी कार्यकारी अध्यक्ष नियुक्त गर्ने निर्णय गरेको हो।

लामो समयदेखि नेतृत्व र व्यवस्थापनका चुनौती झेल्दै आएको नेपाल वायुसेवा निगममा यो नियुक्तिलाई सुधारको प्रयासका रूपमा हेरिएको छ। अब नयाँ नेतृत्वले निगमको सेवा विस्तार, व्यवस्थापन सुधार, वित्तीय अनुशासन र संस्थागत पुनर्संरचनामा कस्तो परिणाम दिन्छ भन्नेमा सबैको चासो केन्द्रित भएको छ।