काठमाडौं । नेकपा एमालेको अध्यक्षमा तेस्रो पटक लगातार निर्वाचित केपी शर्मा ओलीले बिहीबार औपचारिक रूपमा शपथ ग्रहण गरेका छन्।

एमालेको ११औँ राष्ट्रिय महाधिवेशनबाट पुनः अध्यक्षमा निर्वाचित भएपछि ओलीले शपथ लिएका हुन्। शपथ ग्रहण समारोहपछि निर्वाचन आयोगका अध्यक्ष विजय सुब्बाले अध्यक्ष ओलीलाई पुष्पगुच्छा प्रदान गर्दै बधाई तथा शुभकामना व्यक्त गरे।

यसअघि ओली २०७८ सालमा चितवनको सौराहामा सम्पन्न १०औँ महाधिवेशनबाट दोस्रो कार्यकालका लागि अध्यक्षमा निर्वाचित भएका थिए। त्यसअघि २०७१ सालमा काठमाडौंमा सम्पन्न नवौँ महाधिवेशनबाट उनी पहिलो पटक पार्टी अध्यक्ष बनेका थिए।

यद्यपि, २०६५ सालमा बुटवलमा सम्पन्न आठौँ महाधिवेशनमा भने ओली झलनाथ खनालसँग पराजित भएका थिए।

अध्यक्ष ओलीसँगै पार्टीका अन्य केन्द्रीय पदाधिकारी तथा केन्द्रीय सदस्यहरूले पनि शपथ ग्रहण गरेका छन्।