काठमाडौं। काठमाडौंका पूर्वप्रमुख जिल्ला अधिकारी छवि रिजाल पक्राउ परेका छन्। अपराध अनुसन्धान कार्यालयको टोलीले उनलाई नियन्त्रणमा लिएको हो।

रिजालमाथि गत भदौ २३–२४ गते भएको जेनजी आन्दोलन दमन गरेको आरोप छ। उनी तत्कालीन गृहमन्त्री रमेश लेखक निकट थिए। जेनजी आन्दोलनपछि उनी एक महिना नपुग्दै सीडीओबाट हटाइएका थिए।

गौरीबहादुर कार्की नेतृत्वको जाँचबुझ आयोगले रिजालसमेत कारबाही सिफारिस गरेको थियो। आयोगकै सिफारिसमा पूर्व प्रधानमन्त्री एवं एमाले अध्यक्ष केपी शर्मा ओली र तत्कालीन गृहमन्त्री रमेश लेखक पनि पक्राउ परेका थिए।

रिजाल सीडीओ हुनुअघि गृह मन्त्रालयको प्रशासन महाशाखाका प्रमुख थिए। त्यस क्रममा कर्मचारीहरूको अध्यागमन, कार्यालय स्थानान्तरण र अन्य प्रशासनिक निर्णयमा ‘पेशागत आचरण विपरीत’ काम गरेको आरोप लगाइएको छ।

अख्तियारले विशेष अदालतमा पठाएको विवरणअनुसार रिजालमाथि भ्रष्टाचार र अस्वभाविक प्रशासनिक गतिविधिमा अनुसन्धान भइरहेको छ। साथै, तत्कालीन सचिव, निजी सचिव र अन्य अधिकारीहरूमाथि पनि अनुसन्धान जारी छ।