वीरगञ्ज। वीरगञ्ज महानगरले रेल्वेसडकस्थित छपकैयाँमा निर्माण गरेको तरकारी तथा फलफूल बजार सञ्चालनमा ल्याएको छ। नयाँ बजारले शहरमा थोकबजारको अभाव पूर्ति गर्ने विश्वास लिइएको छ।

महानगरका प्रमुख राजेशमान सिंह अनुसार बजार स्थानीयवासीका लागि तयार पारिएको हो। “सफा, सुरक्षित र व्यवस्थित बजार बनाउन यहाँका स्थानीयवासीको भूमिका महत्वपूर्ण छ। यो हाम्रो सम्पत्ति र धरोहर हो,” उनले भने। साथै, प्रमुख जिल्ला अधिकारी भोला दाहाल ले बजार सञ्चालनले किसान र उपभोक्ता दुवैलाई लाभ हुने बताए। किसानले सहज रूपमा उत्पादन ल्याउन सक्ने र उपभोक्ताले व्यवस्थित रुपमा खरिद गर्न सक्नेछन् ।

पहिलो चरणमा ७० लाख रुपैयाँको लागतमा निर्माण भएको बजारमा १४ युनिटमा २८ वटा सटर सञ्चालनमा आएका छन् । बजारमा बिजुली, पानी, शौचालय, ढल निकास र सुरक्षा व्यवस्थासहित सबै आधारभूत सुविधा उपलब्ध छन्। महानगरले दोस्रो चरणमा थप ७० लाख रुपैयाँ लगानी गर्दै युनिट संख्या र भौतिक संरचना विस्तार गर्ने योजना रहेको पनि जनाएको छ।

खुद्रा र थोक कारोबार अलग संरचनाबाट सञ्चालन हुने भएकाले व्यवसायीलाई दीर्घकालीन योजनासहित कारोबार गर्न सहज हुनेछ।