काठमाडौं । गृहमन्त्री ओमप्रकाश अर्याल र नेपालका लागि भारतीय राजदूत नवीन श्रीवास्तवबीच आइतबार गृहमन्त्रालयमा भेटवार्ता भएको छ । करिब ४५ मिनेट लामो भेटमा आगामी प्रतिनिधिसभा निर्वाचनको सुरक्षा र दुर्गा प्रसाईंको पछिल्लो भारत भ्रमण मुख्य विषय बनेको स्रोतले जनाएको छ ।

‘राष्ट्र, राष्ट्रियता, धर्म, संस्कृति र नागरिक बचाऔं महाअभियान’ का संयोजक प्रसाईं दिल्ली भ्रमणबाट फर्किएपछि गृहमन्त्रीले भारतीय पक्षसँग त्यसबारे जानकारी लिएका हुन् । राजदूत श्रीवास्तवले प्रसाईंले भारतमा कुनै राजनीतिक भेटघाट नगरेको बताएका छन् ।

भारत भ्रमणबाट फर्कँदा प्रसाईंलाई दिल्ली अध्यागमनले करिब आधा घण्टा केरकार गरेको थियो । नेपालमा राजावादी आन्दोलनको तयारीमा रहेका प्रसाईंमाथि हाल सुरक्षा निकायले निगरानी बढाएको छ ।