मुस्ताङ । गएरातिदेखि उपल्लो मुस्ताङका विभिन्न उच्च हिमाली क्षेत्रमा हिमपात भएको छ। जिल्ला प्रहरी कार्यालय मुस्ताङका अनुसार कात्तिक १० गते राति वर्षासँगै मुक्तिनाथ, घमी र सोभन्दा माथिल्ला क्षेत्रहरूमा व्यापक हिमपात भएको हो।

हिमपातसँगै चिसो बढेको र सडकमा हिउँ जम्न थालेपछि स्थानीय बासिन्दा र यात्रुहरूलाई सावधानीपूर्वक यात्रा गर्न प्रहरीले आग्रह गरेको छ। प्रहरीका अनुसार उक्त क्षेत्रमा हावाहुरी र हिउँका कारण सडक फिस्लो बनेकाले यात्रु तथा तीर्थयात्रीहरूले सम्भव भएसम्म आवश्यक तयारीसहित मात्र यात्रा गर्न सुझाव दिइएको छ।

मुस्ताङमा यतिखेर तापक्रम घट्दै गएको छ भने हिमपातका कारण मुक्तिनाथ क्षेत्रमा दृश्य सौन्दर्य थपिएको छ।
स्थानीयले हिमपातसँगै गाउँ वरिपरि सेतो हिउँको चादर ओढिएको बताउँदै यसलाई आगामी पर्यटन सिजनको शुभ संकेतका रूपमा लिएका छन्।