काठमाडौं । नेकपा (एमाले) का अध्यक्ष तथा पूर्वप्रधानमन्त्री केपी शर्मा ओलीले पार्टीभित्र अनुशासन कायम गर्न नसकिएको विषयमा खुलेर आत्मालोचना गर्दै संगठन सुदृढीकरणको नयाँ बाटो खुलाएका छन्। केन्द्रीय कमिटी बैठकको समापन सत्रमा सम्बोधन गर्दै अध्यक्ष ओलीले स्पष्ट शब्दमा भने,

“पार्टीमा अनुशासन कायम गर्न सकिएन, नेताहरूले पनि अनुशासन तोड्ने काम गरे, त्यसलाई नियन्त्रण गर्न सकिएन। अध्यक्षको रूपमा त्यो काम गर्न नसकेकोमा म खुलेर आत्मालोचना गर्छु।” उनले पार्टीको आन्तरिक कमजोरीलाई इमान्दारीपूर्वक स्वीकार गर्दै सुधारको दिशामा सामूहिक प्रयास आवश्यक रहेको बताए। ओलीले थपे, “कमी कमजोरी छन्, त्यसलाई करेक्सन गरौँ, आलोचना पनि गरौँ, तर दुस्मनी देखिने गरी गालीगलौज कसैले नगरौँ।”

अध्यक्ष ओलीको भनाइमा, पार्टीमा विचार र दृष्टिकोणका फरक मत स्वाभाविक भए पनि संगठनात्मक अनुशासन र एकतामा कुनै सम्झौता हुन नहुने स्पष्ट सन्देश छ। उनले भने, “विचारमा मतभेद हुन सक्छ, तर व्यवहारमा अनुशासन र संगठनको सुदृढीकरण सबैको साझा जिम्मेवारी हो।”

बैठकमा उनले पार्टीभित्र आलोचना–आत्मआलोचनाको संस्कृतिलाई संस्थागत गर्दै संगठनलाई अझ जिम्मेवार, उत्तरदायी र जनमुखी बनाउनुपर्नेमा जोड दिए। राजनीतिक विश्लेषकहरूका अनुसार ओलीको यो आत्मालोचना केवल कमजोरी स्वीकार गर्ने होइन, नेतृत्वको उत्तरदायित्व बोध गर्ने परिपक्व कदमका रूपमा लिइएको छ। उनीभित्रको आत्ममूल्यांकनले एमालेभित्र सकारात्मक परिवर्तन र सुधारको वातावरण निर्माण गर्ने अपेक्षा गरिएको छ।