काठमाडौं । नवनियुक्त उर्जा मन्त्री कुलमान घिसिङले डेडिकेटेड ट्रंकलाइनको विद्युत महशुलको बक्यौता रकम असुल्ने निर्णय गरेका छन्। सोमबार सिंहदरबारस्थित मन्त्रालयमा पदभार ग्रहण गर्दै मन्त्री घिसिङले यसलाई आफ्नो पहिलो निर्णयको रूपमा घोषणा गरेका हुन्।

उनले भने, “आजको यस पदबहालीको पहिलो निर्णय डेडिकेटेड र ट्रंकलाइनको विद्युत महशुलको जुन बक्यौता छ, त्यो रकम असुल्ने निर्णय भएको छ।” घिसिङले यसअघि प्राधिकरणको कार्यकारी निर्देशक रहँदा पनि बक्यौता रकम असुल्ने प्रयास गरेका थिए, तर तत्कालीन सरकारले रोक लगाएको जानकारी दिए।

मन्त्री घिसिङले भ्रष्टाचार र अनियमितता विरुद्ध कडा कदम चाल्ने स्पष्ट चेतावनी दिएका छन्। उनले भने, “अब कसैले र कुनै पनि निकायले भ्रष्टाचार र अनियमितता गरेको भेटियो भने हामी कडा भन्दा कडा कारबाही गर्नेछौं। भ्रष्टाचार नियन्त्रण मेरो लागि जीवन मरणको विषय हो। यो ठूलो चुनौती लिएर म आएको छु।” उनको यो निर्णयले विद्युत क्षेत्रको सुधार र पारदर्शिता कायम गर्न सरकारको प्रतिबद्धता झल्काएको छ। आगामी दिनमा भ्रष्टाचार नियन्त्रणमा कडाइ गरिने अपेक्षा गरिएको छ।