सिन्धुली: कमलामाई नगरपालिकाका नगरप्रमुख उपेन्द्रकुमार पोखरेलले सरकारी तलवभत्ता खाएर आफ्ना छोरा छोरी सामुदायिक विद्यालयमा नपढाउने शिक्षकहरुलाई कारबाही गरेर जाने बताउनु भएको छ ।
कमलामाई नगरपालिका भित्रका सामुदायिक विद्यालयका प्रधानाध्यापकहरुको बैठकलाई सम्बोधनगर्दै आज (आइतवार) सो कुरा बताउनु भएको हो ।
कमलामाई नगरपालिकाको कार्यपालिका बैठकबाट जनप्रतिनिधी, कर्मचारी र सामुदायिक विद्यालयमा कार्यरत शिक्षकहरुले आफ्ना नानीबाबुहरु अनिवार्य रुपमा सरकारी विद्यालयमा भर्ना गर्नुपर्ने नीतिगत निर्णय गरेको स्मरण गराउँदै नगरप्रमुख पोखरेलले उक्त निर्णयलाई कार्यान्वय नगर्ने र अबरोध सिर्जना गर्ने शिक्षकहरुलाई कारबाही गरेरै छाड्ने बताउनुभयो ।
शिक्षा कस्तो बनाउने भन्ने विषय स्थानीय तहको अधिकार भएकाले सामुदायिक विद्यालयमा अरुलाई पढाउने तर आफ्नो छोरा छोरी निजी विद्यालयमा लैजाने शिक्षकहरुमाथि प्रश्न उठ्न थालेको बताउनु भयो । उहाँले अगाडि भन्नुभयोः आफूले पढाएको आफूलाईनैं विश्वास नभएर छोरा छोरी निजी विद्यालयमा लैजानेहरुको बिबरण तयार भइसकेको बताउँदै शैक्षिक सुधारमा असहयोग गर्नेहरुलाई कारबाही गरेरै अगाडि बढ्ने उद्घोष गर्नुभयो ।
बैठकमा सहभागी प्रधानाध्यापकहरुले नगरपालिकाले गरेको निर्णयलाई कार्यान्वयन गरेर लैजाने उद्घोष गर्नुभएको थियो । उहाँहरुले सामुदायिक विद्यालयको प्रशासन सञ्चालनमा रकम अभाव रहेको बताउँदै आगामी आर्थिक वर्षको वजेटमा रकम व्यवस्था गरिदिन नगरप्रमुख पोखरेललाई आग्रह गर्नुभएको थियो ।