ललितपुर, १३ चैत :   कोरोना भाइरस संक्रमणबाट नेकपा एमाले डोल्पा जिल्ला कमिटी अध्यक्ष दत्त रोकायाको निधन भएको छ ।
शुत्रबार बिहान पाटन अस्पतालमा रोकायाको निधन भएको एमाले डोल्पाका सचिवालय सदस्य लंकबहादुर शाहीले बताए । ‘उहाँको दुई सातादेखि पाटन अस्पतालमा उपचार भइरहेको थियो । , ‘नेपाली सेनाको टोलीले आजै पशुपति आर्यघाटमा अन्त्येष्टी गर्ने जनाएको छ ।

रोकायालाई ज्वरो आएपछि जाँच गराउँदा कोरोना संक्रमण पुष्टी भएको थियो ।  एक महिनाअघि रोकाया पार्टीको कामको सिलिसलामा काठमाडौ आएका थिए । ३६ सालको विद्यार्थी आन्दोलनबाट राजनीतिमा आएका रोकाया पञ्चायतकालमा कालिका माध्यमिक विद्यालयका हेडमास्टर थिए ।

‘२०४७ सालमा डोल्पामा एमालेको जिल्ला कमिटी बन्दा उहाँ संस्थापक अध्यक्ष हुनु भएको हो,’ शाहीले भने, ‘त्यसयता एक पटक बीचमा पाँच वर्षबाहेक सधै जिल्ला कमिटी अध्यक्षको रुपमा क्रियाशील रहनुभयो ।’