काठमाडौँ, ८ फागुन । सिन्धुपाल्चोक जुरे पहिरोपीडितले सात वर्षसम्म राहत नपाएपछि काठमाडौंको माइतीघरमा धर्नासहित प्रदर्शन गरेका छन् । दाताले छुट्याएको रकमसमेत सरकारले उपलब्ध नगराएको भन्दै शनिवार उनीहरुले धर्नासहित प्रदर्शन गरेका हुन् ।

जुरे पहिरो पीडितहरुको लागि सहयोग जुटेको सहयोग रकम सरकारले अहिलेसम्म आफूहरुलाई नदिएको उनीहरुको गुनासो छ ।

जुरे पहिरो प्रभावितहरुले आफूहरुको नाममा देश विदेशबाट संकलन गरेको रकम समेत नदिइएको भन्दै आक्रोशसमेत पोखेका छन् । आफूहरुको माग पूरा नभएसम्म जुरे गाउँपालिकाको तर्फबाटै निरन्तर आन्दोलनका कार्यक्रमहरु गर्ने उनीहरुले चेतावनी दिएका छन् ।

साविकको राम्चे गाउँ विकास समितिमा २०७१ साउन १७ गते राती इटिनी भिरबाट आएको पहिरोले साविकको मांखा, बाह्रविसेको जुरे र टेकानपुर गाविससम्म पहिरो जाँदा ठुलो मानवीय र भौतिक क्षती भएको थियो । पहिरोमा १ सय ४५ को मृत्यु भएको थियो ।