काठमाडौं, ३० माघ । चीनको ह्वावे कम्पनि फाइभजी प्रविधि हस्तान्तरणका लागि तयार भएको छ । ह्वावेका संस्थापक तथा सीईओ रेन झेंगफेईले खुला नीतिलाई समर्थन गर्दै प्रविधि हस्तान्तरणका लागि तयार रहेको बताएका हुन् । चीनको ताइयुआनमा इन्टेलिजेन्ट माइनिङ इनोभेशन प्रयोगशालाको उद्घाटन समारोहमा बोल्दै उनले खुला व्यापार नीतिले आपसी विकास सम्भव बनाउने भन्दै ग्लोबल आईसीटी इकोसिस्टम निमार्णको लागि ह्वावे फाइभजी प्रविधि ट्रान्सफर गर्न इच्छुक रहेको बताए ।

‘अमेरिका र चीन दुवैले आफ्नो अर्थतन्त्रको विकास गर्न आवश्यक छ,’ उनले भने, ‘किनकि प्रविधि हाम्रो समाज र वित्तीय सन्तुलनको लागि आवश्यक छ । यस्तोमा कुनै पनि एक कम्पनीले एक्लै विश्व उद्योगको विकास गर्न सक्दैन । यसको लागि विश्वभरि ठोस प्रयासको हुन आवश्यक छ ।’

विश्वव्यापी रूपमा फाइभजीकोे सम्भावित प्रभावको बारेमा चासो देखाउँदै उनले भने, ‘हामी अरूलाई उत्पादन लाइसेन्स दिन मात्र होइन, फाइभजी प्रविधिलाई ट्रान्सफर गर्न पनि तयार छौं । जसमा सोर्स प्रोग्राम र सोर्स कोड देखि लिएर हार्डवेयर डिजाइनका साथै यसका ज्ञान र चिप डिजाइन समेत ट्रान्फर गर्न तयार छौं ।’