धुलिखेल १२ पुस : काभ्रेको महाभारत गाँउपालिका बाट सुत्केरी महिलाको हेलिकप्टर मार्फत उद्धार गरिएको छ । गाँउपालिकाको वडा नम्बर ८ का २८ वर्षीय लोक माया दर्लामीलाई हेलिकप्टर मार्फत उद्धार गरिएको गाँउपालिकाका अध्यक्ष कान्छालाल जिम्बाले जानकारी दिनुभयो । दर्लामीले आजै बिहान घर्तीछाप स्वास्थ चौकीमा बच्चा जन्माउनुभएको थियो ।

बच्चा जन्मीए पछि बच्चाको सालनाल (प्लासेन्टा) अड्किएर अत्याधिक रक्त श्र्राव भएको घर्तीछाप स्वास्थ चौकीले जनाएको छ । अत्याधिक रक्त श्र्रावका कारण उहाँ बेहोस समेत भएकाले तत्काल हेलिकप्टर मार्फत उद्धार गरिएको हो । उद्धार पछि उहाँलाई अहिले प्रशुति गृह काठमाण्डौमा लागीएको अध्यक्ष जिम्बाले बताउनुभयो ।

घर्तीछाप स्वास्थ्य चौकीले हेलिकप्टरको माग गरेपछि जिल्ला प्रशासन कार्यालय काभ्रे महिला, बालबालिका तथा ज्येष्ठ नागरिक मन्त्रालयलाई पत्र पठाएको थियो । राष्ट्रपति कार्यालयले यहि मन्त्रालय मार्फत दुर्गम क्षेत्रका ज्यान जोखिममा परेका गर्भवती तथा सुत्केरी महिलाको हेलिकप्टरबाट उद्धार गर्दै आएको छ । यसरी उद्धार गरिएका महिलाको उपचार खर्च समेत मन्त्रालयले नै ब्यहार्ने गरेको छ ।