धुलिखेल, २५ असारः सभामुख अग्नि प्रसाद सापकोटा पहिरो प्रभावित क्षेत्रको अवस्था बुझ्न बाह्रबिसे पुग्नुभएको छ । नेपाली सेनाको हेलिकप्टर मार्फत सभामुख सापकोटा बाह्रबिसे पुग्नु भएको हो ।

सभामुख सापकोटाले जिल्ला स्थित सुरक्षा निकाय, स्थानीय तहको प्रमुख एवं प्रतिनिधिहरुसँग घाइतेहरको उद्धार र उपचार, बेपत्ताहरुको खोजी र राहतको बारेमा छलफल गर्ने बताइएको छ ।
गएराति अवरिल वर्षासँगै सिन्धुपाल्चोक जिल्लाको दुई छुट्टा छुट्टै ठाउँमा आएको पहिरोमा परी १८ जना बेपत्ता भएका छन् । जिल्ला प्रशासन कार्यालयले प्रारम्भिक जानकारी भन्दै बाह्रबिसे गाउँपालिकाका १४ जना र भोटेकोशी गाउँपालिकाका ४ जना गरी १८ जना बेपत्ता भएको पुष्टि गरेको । अविरल वर्षासँगै आएको पहिरोले बाह्रबिसे नगरपालिका वडा नम्बर ५ जम्बुमा ११ वटा घर बगाएको छ । २ जनाको शव फेला परेको छ भने ३ जना घाइते छन् । १४ जना बेपत्ता छन् ।

त्यस्तै भोटेकोशी गाउँपालिका वडा नम्बर ५ लाम्बोटेमा पहिरोले २ वटा घर बगाएको जिल्ला प्रशासकन कार्यालय सिन्धुपाल्चोकले जनाएको छ । लाम्बोटेका ४ जना बेपत्ता छन् भने २ जना घाइते भएका छन् । पहिरोमा पुरी बेपत्ता भएकाहरुको खोजीका लागि नेपाल प्रहरी, सशस्त्र र नेपाली सेनाले खोजी भइरहेको छ ।