काठमाडौं । नेपाली चलचित्र क्षेत्रका चर्चित दुई कलाकारको आन्तरिक द्वन्द्ध थप चर्किएको छ ।अभिनेता तथा निर्माता भुवन केसी र अभिनेत्री साम्राज्ञी राज्य लक्ष्मीबीचको एकसाता देखिको जुहारी सामाजिक संजालमा सेलाउन सकेकै छैन ।

अभिनेत्री साम्राज्ञीले चलचित्र ‘ड्रिम्स’ को सेटमा निर्माता तथा निर्देशक भुवन केसीले नराम्रो व्यवहार गरेको र जापान अवार्डमा दुर्व्यवहार गरेको आरोप लगाएपछि अभिनेता भुवन केसी उजुरी नै दर्ता गर्न बाध्य भएका छन् ।

केसीले चलचित्र कलाकार संघमा सत्यतथ्य छानविनको माग गर्दै निवेदन पेश गरेका छन् । उनले बिहीवार संघको कार्यालय पुगेर निवेदन दिएका हुन् । उनले संघमा निवेदन दिनुभन्दा अगाडि फेसबुकमा लामो स्टाटस लेख्दै आफूलाई ब्रेक दिने पितातुल्य व्यक्तिको बारेमा अनर्गल र झुटा कुरा नबोल्न साम्राज्ञीलाई चेतावनी दिएका छन् ।

केसीले लेखेको पत्रमा भए नभएको कुरालाई सामाजिक सञ्जालमा राखेर यूट्युबलगायत विभिन्न सञ्चारमाध्यममा आफ्नो चरित्रहत्या गर्ने दुस्साहस भएकोमा उनले संघसँग निष्पक्ष छानविनको माग गरेका छन् ।

स्टाटसमा भुवनले लेखेका छन–मेरो यो सुचनाको बावजूद तपाईंले यस्ता झुठा लाञ्छना लगाउने कार्यहरु गरे गराएमा तपाईं ऊपर प्रचलित साइबर कानुन र मानहानी सम्बन्धि कानुनको प्रयोग गरी मलाई पुग्न गएको मान सम्मानका हानी नोक्सनी उपर तपाईंबाट यथोचित क्षतिपूर्ती गराउने र तपाईंलाई कानुन बमोजिमको सजायको भागेदारी गराउनुको निमित्त आवश्यक कानूनी प्रकृयाको थालनी गर्ने ब्यहोरा तपाईंलाई बढो दुःखका साथ जानकारी गराउँदछु ।’

यता साम्राज्ञीले पनि कानुनी बाटो रोज्ने बताएकी छन् । तेस्रो भिडियो बिहीबार बेलुका इन्स्टाग्राममा पोस्ट गर्दै आफूमाथि शोषण भएको दाबी गरेकी छन् । उनले अब कानुन व्यवसायीसँग छलफल गरेर न्यायको लागि अपिल गर्ने पनि उनले बताएकी छन् ।