धुलिखेल, ९ असारः काभ्रेका अधिकांश स्थानीय तहले नीति, कार्यक्रम र बजेट निर्माणको काम अन्तिम चरणमा पुर्याएका छन् । आगामी आर्थिक वर्षको कार्यक्रम र बजेट असार १० गतेभित्र सार्वजनिक गर्नै पर्ने कानुनी प्रावधानका कारण पनि जनप्रतिनिधि र कर्मचारी निकै ब्यस्त देखिएका छन् ।

जिल्लाको डाँडापारी क्षेत्रमा पर्ने खानीखोला र महाभारत गाउँपालिकाले पनि भोली नै बजेट सार्वजनिक गर्ने बताएका छन् । त्यस्तै कोशीपारी क्षेत्रमा रहेको चौरीदेउराली र भुम्लु गाउँपालिकाले पनि बजेट सार्वजनिक गर्ने अन्तिम तयारी गरिहेका छन् । रोशी र बेथानचोक गाउँपालिकाले पनि भोली बजेट र कार्यक्रम सार्वजनिक गर्ने बताएका छन् ।

जिल्लाको सबैभन्दा कान्छो मण्डनदेउपुर नगरपालिकाले आगामी आर्थिक वर्षका लागि बजेट सार्वजनिक गर्न आवश्यक तयारी लगभग पुरा गरेको जनाएको छ । त्यस्तै बनेपा, धुलिखेल, पनौती, नमोबुद्ध र पाँचखाल नगरपालिकाले पनि बजेट प्रस्तुतिका लागि आवश्यक तयारी अन्तिम चरणमा पुर्याएको दाबी गरेका छन् ।

तेमाल गाउँपालिकाले पनि भोली नै बजेट सार्वजनिक गर्ने गरी सबै पक्षसँगको छलफललाई निरन्तरता दिइरहेको छ ।