धुलिखेल, ७ असारः सिन्धुपाल्चोकको चौतारासाँगाचोक गढी नगरपालिकाले गार्मेन्ट उद्योग सञ्चालनमा ल्याएको छ । नगरपालिकाले वडा नम्बर ५ स्थित चौतारा बजारमा गार्मेन्ट उद्योग सञ्चालनमा ल्याएको हो ।

नगरपालिकाको लक्षित वर्ग शीर्षकको १५ लाख रुपैया बजेटमा उद्योग सञ्चालन गरिएको हो । अहिले १० जनाले काम गर्न सक्ने गरी मेसिन राखिएको छ । बजारको माग अनुसार कपडाहरु उत्पादन गर्ने लक्ष्य सहित उद्योग सञ्चालनमा ल्याइएको वडाध्यक्ष नरमान श्रेष्ठले जानकारी दिए ।

उद्योगमा मेसिन विद्यूतीय जडान गरिएको छ । उद्योगबाट नमुना कपडा उत्पादनको काम सुरु भइसकेको छ । उद्योगका आज नगरप्रमुख अमान सिं तामाङले उद्घाटन समेत गर्नुभएको छ । दलित समन्वय समिति र स्वाबलम्बन बचत तथा ऋण सहकारी संस्थाले उद्योग सञ्चालनको रेखदेख गर्नेछन् ।

उद्योगका क्षमता १५ देखि २० जनासम्मले काम गर्न सक्नेछ । आफ्नै गाउँ ठाउँमा उद्योग सञ्चालनमा आएपछि स्थानीय दलित समुदायका युवाहरुमा पनि खुशी भएका छन् । गाउँमै रोजगार सीर्जना भएको भन्दै उनीहरु खुशी भएका हुन् ।