धुलिखेल, १३ जेठः धुलिखेलका ब्यवसायीहरुले कर छुट गरिदिन नगरपालिकासँग आग्रह गरेका छन् । धुलिखेल उद्योग वाणिज्य संघ र क्षेत्रिय होटल सँघले आज मेयर अशोक ब्याञ्जुलाई भेटेर कर छुटका लागि ज्ञापन पत्र बुझाएका हुन् ।

धुलिखेल उद्योग वाणिज्य संघका अध्यक्ष मञ्जु कुमार कोजु र क्षेत्रिय होटल संघका अध्यक्ष प्रेम कण्ठ मकाजु श्रेष्ठको नेतृत्वमा गएको ब्यवसायीहरुको टोलीले लकडाउनका कारण उद्योग धन्दा बन्द रहेको भन्दै स्थानीय ब्यवसायी कर छुट गर्न आग्रह गरेको हो । संघले आजै प्रमुख जिल्ला अधिकारी मार्फत प्रधानमन्त्रीलाई ज्ञापन पत्र पठाएको छ ।

उनीहरुले कोरोना भाइरसको महामारीसँगै ब्यवसाय चौपट भएको भन्दै बैंक तथा वित्तिय संस्थाहरुलाई ऋणको साँवा र ब्याज तिर्न नपर्ने ब्यवस्था कामय गर्न आग्रह गरेका छन् । लकडाउन अवधि भर बिमाको प्रिमियम तिर्न नपर्ने र नोक्सानको क्षतिपुर्ति मिलाउन ब्यवसायीहरुले आग्रह गरेका छन् ।

ब्यवसायीहरुले ऋणको अवधि ३ वर्ष थप गर्न र लकडाउन खुलेको २ वर्षसम्म ब्याजर ५ प्रतिशत मात्रै लिने ब्यवस्था गर्न समेन माग गरेका छन् ।