धुलिखेल, १० जेठः कोभिड १९ रोकथाम तथा नियन्त्रण कमाण्ड पोष्ट काभ्रेले शुक्रबार साझँ आफ्नो प्रगति विवरणमा ५ बेडको आइसोलेसन कक्ष थपिएको जानकारी गरायो । कमाण्ड पोष्टको तर्फबाट स्वास्थ्य कार्यालय काभ्रेका प्रमुख डाक्टर नरेन्द्र कुमार झाले पठाएको विवरणमा बनेपा नगरपालिका स्थित नेपाल रेडक्रस सोसाइटी, काभ्रेमा ५ बेडको आइसोलेसन कक्ष थपिएको उल्लेख छ ।

दुई ठूला अस्पताल रहेको काभ्रेमा लकडाउन भएको दुई महिना पुग्दासम्म पनि ओइसोलेसन कक्ष नबढाइएकाे भन्दै जिल्लाबासीले असन्तुष्टि जनाइरहेका बेला खुशी पनि लाग्यो विवरण हेर्दा । दिनप्रतिदिन आरडिटी परीक्षणमा कोरोना भाइरसको पोजेटिभ देखिनु र आइसोलेसन कक्ष नबढिरहेका बेला संत्रास बढिरहेको छ । यसैबेला जिल्ला कमाण्ड पोष्टले ५ बेडको आइसोलेसन कक्ष थपिएको र संख्या १८ पुगेको बतायो ।

तर जिल्ला कमाण्ड पोष्टले जुन ठाउँमा आइसोलेसन बेड थपियो भन्यो त्यो ठाउँका पदाधिकारी भने यो विषयमा अनविज्ञ छन् । नेपाल रेडक्रस सोसाइटी काभ्रेमा अहिलेसम्म कुनै किसिमको आइसोलेसन बेड नबनेको कार्यालय प्रमुख त्रिरत्नराज बहाकले पुष्टि गरे । उनका अनुसार नेपाल रेडक्रस सोसाइटी केन्द्रिय तालिम केन्द्र बुडोलमा ५० बेडको क्वारेन्टाइन बाहेक अन्य कुनै पनि शाखा, उपशाखामा कोरोना भाइरसका बिरामी राख्ने गरी बेड राखिएको छैन् ।

हाल अहिले धुलिखेल अस्पतालमा ८ र शीर मेमोरियल अस्पतालमा ५ गरी जम्मा १३ बेडको मात्रै आइसोलेसन कक्ष छन् । जिल्लामा आरडिटीमा कोरोना पोजेटिभ देखिए आइसोलेसन बेड अभाव हुदैँ गएको छ ।

शुक्रबार बसेकाे संकट ब्यवस्थापन केन्द्र (सीएमसी) ले जिल्लामा ५० बेडको आइसोलेसन बेड बनाउने समेत निर्णय गरेको छ । संघ, प्रदेश र दातृ निकायको सहयोगमा आइसोलेसन बेड निर्माण गरिने प्रमुख जिल्ला अधिकारी एवं सीएमसीका संयोजक श्रवण कुमार तिमिल्सिनाले जानकारी दिए ।