धुलिखेल, ५ जेठः सिन्धुपाल्चोक जिल्लाको लिसंखु पाखर गाउँपालिका वडा नम्बर २ ले घरभाडा छुटका लागि घरधनीलाई लिखित पत्र पठाउने भएको छ । लकडाउनका कारण भाडा लिएर होटल ब्यवसाय गर्ने ब्यक्तिहरु चरम मारमा परेको भन्दै लकडाउन अवधिभरका घरभाडा छुटका गर्न लिखित रुपमै घरधनीलाई आग्रह गर्ने वडाध्यक्ष हस्त बहादुर मोक्तानले जानकारी दिए ।

पालिकाका उपाध्यक्ष हेमगंगा मोक्तानक सहित सोमबार बसेका वडाका जनप्रतिनिधि र बजार ब्यवस्थापन समितिको बैठकले यस्तो निर्णय गरेको हो । बैठकले आफ्नो वडा प्रवेश गर्ने नाकाहरु पूर्णमा शील गरेको जनाएको छ । आफ्नो वडामा कोरोना भाइरसको संक्रमण नभित्रियोस भन्नकालागि स्वास्थ्य चौकी र मेडिकल आउनुपर्ने भए वडा कार्यालय र प्रहरी चौकीलाई पूर्व गराए मात्रै वडाप्रवेश गर्न भनेको छ ।

बैठकले वडाभित्र खाद्यान्न पसल खोल्ने समयसमेत निर्धारण गरेको छ । विहान ६ बजेदेखि ९ बजेसम्म र दिउँसो ४ बजेदेखि साँझ ६ बजेसम्म खाद्यान्न पसल खुल्न पाउनेछ । होटल पूर्ण रुपमा बन्द गर्ने निर्णय भएको वडाध्यक्ष मोक्तानले बताए । बैठकले धान, मकै, तोरी कुटानी, पसानी गर्ने मिलमा सामाजिक दुरी अनिवार्य रुपमा पालना गरेर मात्रै सञ्चालन गर्न दिने निर्णय गरेको छ ।