धुलिखेल, ४ जेठः काभ्रेको भुम्लु गाउँपालिका वडा नम्बर १ सापिङ्ग, उर्लेनीका किसान चिन्तित बनेका छन् । अमेरिकन फौजी किराले मकैबाली खाएपछि किसान चिन्तित बनेका हुन् ।

दोस्रो पटक गोड्ने बेला हुन लागेको मकैबाली फौजी किराले सखाप पार्न लागेको स्थानीय टिका बहादुर जिसीले जानकारी दिए । उर्लेनी गाउँका अधिकांश किसानका बारीमा फौजी किरा देखिएको छ । त्यसमा पनि टिका बहादुर जिसी, गोबिन्द बानिया, रमेश बुढाथोकी र देवकी जिसीको बारीमा लगाएको मकैबालीमा भने निकै ठूलो क्षति पुर्याएको छ ।

८ देखि १० पात भैसकेका मकैबालीमा फौजी किराले आक्रमण गरेको हो । वडा कार्यालय र गाउँपालिकाले अमेरिकन फौजी किरा नियन्त्रणका लागि कुनै चासो नदिएको किसानहरुले गुनासो गरेका छन् । वडा र पालिकाले बिषादी छर्कन सल्लाह दिएपनि विषादी गाउँमा नपाइने भएकाले समस्या भएको किसानहरुले बताएका छन् ।

विषादी लिन दोलालघाट वा पाँचखालसम्म आइपुग्नुपर्ने र आफुहरुसँग साधन नभएकाले पैदल हिडेर जान सम्भव नभएको किसानहरुले बताएका छन् । ‘सामान्य अवस्था भए त आफै विषादी लिन जान हुन्थ्यो, अहिले गाडी पनि चलेको छैन, साधन पनि छैन, टिका बहादुरले भने ‘समयमै पानी परेकाले मकैबाली निकै राम्रो थियो, तर सखाब परिदियो ।’