धुलिखेल २१ बैशाख कोरोना भाइरस नियन्त्रण तथा रोकथामका लागि लगाएको लकडाउन उलंघन गर्दै मदिरा विक्रि वितरण गर्ने पाँचखाल, बनेपा र धुलिखेलका होटलहरुमा प्रहरीले छापा मारेका छन् ।

प्रहरी चौकी खावाले पाँचखाल नगरपालिकाको वडा नम्बर ५ र ६, धुलिखेल नगरपालिका ८ बाट करिब असी लिटर घरेलु मदिरा बरामद गरी नष्ट गरेको खावा प्रहरी चौकीका ईन्चार्ज श्रीकृष्ण दासले बताए ।

प्रशासनले भट्टीपसल नखोल्न उर्दी जारी गरेपनि अटेर गरेर होटल र पसल सञ्चालन गरी मदिरा विक्रि गरेपछि नियन्त्रणमा लिएको प्रहरी इन्चार्ज दासले जनाकारी दिए । यसैगरी इलाका प्रहरी कार्यालय बनेपाका प्रमुख योगेन्द्र तिमिल्सिनाको नेतृत्वले बनेपा नगरपालिकाको भित्री बजारहरुमा लक डाउनको उलंघन गरी संचालन गरेका होटल, भट्टिपसलहरुमा छापा मारेका छन् । प्रमुख तिमिल्सिनाका अनुसार ती होटल र भट्टिपसलहरुबाट करिव १५०० लिटर घरेलु मदिरा नियन्त्रणमा लिइ नष्ट गरेका छन् ।