धुलिखेल, २७ चैतः काभ्रे जिल्लाका सबै स्थानीय तहमा संकट ब्यवस्थापन केन्द्र गठन गर्नु पर्ने भएको छ । जिल्ला स्तरीय संकट ब्यवस्थापन केन्द्रले सबै स्थानीय तहहरुमा पनि केन्द्र गठन गर्न आग्रह गरेको हो । जिल्लामा प्रमुख जिल्ला अधिकारीको संयोजकत्वमा संकट ब्यवस्थापन समिति गठन भइसकेको छ । समितिको आज बसेको बैठकले जिल्लाका सबै स्थानीय तहमा जतिसक्दो छिटो संकट ब्यवस्थापन केन्द्र गठन गर्ने निर्णय गरेको हो ।

समितिले स्थानीय तहमा पनि बिरामी उद्दार टोली समेत गठन गर्न भनेको छ । कोभिड– १९ मैत्री एम्बुलेन्स द्वारा भाइरसको शंका लागेका विरामी अस्पतालमा ल्याउँदा आवश्यक सुरक्षा ब्यवस्था मिलाउने, विषम र जटिल परिस्थिति भएका बिरामीलाई प्रहरीको स्कटिङ सहित ल्याउनु पर्ने छ ।

बैठकले कोभिड १९ रोगको संक्रमण नियन्त्रणका लागि कुनै प्रकारका भेला, महोत्सव, जात्रा, पर्वहरु पूर्ण रुपमा हुन नदिने पनि निर्णय गरेको छ ।