धुलिखेल, १८ चैतः सरकारले पहिलो चरणमा घोषणा गरेको लकडाउनको अन्तिम दिन आज काभ्रे प्रहरीलेले निकै कडाइ गरेको छ ।

प्रहरीले राजमार्गमा अनावश्यक हिड्डुल गर्ने र हुल बाँधेर घाम ताप्ने १ सय ४९ जनालाई नियन्त्रणमा लिइरहेको छ । सबैभन्दा बढी बनेपाबाट १ सय २२ जनालाई नियन्त्रणमा लिइएको जिल्ला प्रहरी कायालय काभ्रेका डिएसपी कुमार विक्रम थापाले जानकारी दिए ।

जिल्लाको धुलिखेल, पनौती, भकुण्डे, पाँचखाल, कुन्ताबेशी जस्तो मुख्य–मुख्य बजार क्षेत्रमा प्रहरीले सक्रियता बढाएको हो । प्रहरीले मोटरसाइकल २३ वटा, स्कुटी ४, कार र बस सहित २९ वटा सवारी साधनलाई कारबाही गरिएको प्रहरीले जनाएको छ । इलाका बनेपा प्रहरीले १ सय २२ जनालाई पोलिटेक्निकलको खेलमैदानमा लगेर लकडाउनमा ख्याल गर्नुपर्ने कुरा र कोरोना भाइरसबाट जोगिने उपायका बारे ३ घण्टामा सम्म राखेर छोडेको थियो ।

अब देखि अनावश्यक रुपमा बाहिर हिड्डुल नगर्ने लिखित प्रतिबद्धता जनाएर छोडेको इलाका प्रहरी कार्यालय बनेपाका प्रमुख योगेन्द्र तिमिल्सिनाले बताए । प्रहरीले आफु मातहातका सबै युनिटलाई कडा निर्देशन दिदैँ अत्यावश्क बाहेक हिड्डुल गर्ने जो कोहिलाई पनि नियन्त्रणमा लिन भनेको छ ।