धुलिखेल, १८ चैतः काभ्रे जिल्लाका दुई स्थानीय तहले विदेशबाट आफ्नो स्थानीय तहमा आइपुगेकाहरुको विवरण तयार पारेका छन् । पनौती नगरपालिका र रोशी गाउँपालिकाले विदेशबाट फर्केहरुका नागरिकको तथ्याङ्क संकलन गरेको हो ।

फागुन १५ देखि चैत १७ गतेसम्म ९५ जना नागरिक विभिन्न देशबाट पनौती नगरपालिकामा आइपुगेको तथ्याङ्कमा उल्लेख गरिएको छ । सबैभन्दा बढी वडा नम्बर १२ का २३ जना विदेशबाट नागरिक आइपुगेको नगरपालिकाले जनाएको छ ।

त्यस्तै वडा नम्बर ४ मा १४ जना, ११ मा १२ जना र १० नम्बर वडामा १० जना नागरिक विदेशबाट आएका छन् ।
त्यस्तै रोशी गाउँपालिकामा एक महिनाको बिचमा १२ जना विदेशबाट आएका छन् । गाउँपालिकाले संकलन गरेको तथ्याङ्क अनुसार मलेसियाबाट ३ जना, दुबई र कतारबाट २/२ जना, अमेरिका र इराकबाट १/१ जना, जापान र माल्टाबाट १/१ जना आएको स्वास्थ्य शाखाका दिल रत्न शाक्यले बताए ।

नगरपालिका र रोशी गाउँपालिकाका स्वास्थ्य शाखाले विदेशबाट फर्किएका नागरिकलाई निगरानीमा राखेका छन् । घरभित्रै सुरक्षित बस्न र कुनै किसिमको स्वास्थ्य समस्या देखिए तत्काल स्वास्थ्य संस्थामा जान अनुरोध गरेका छन् ।