धुलिखेल, १४ चैतः सिन्धुपाल्चोक जिल्लामा तीन जनालाई आइसोलेसनमा राखेर उपचार थालिएको छ । भोटेकोशी गाउँपालिकाका तिन जनालाई प्राथामिक स्वास्थ्य केन्द्र बाह्रविसेमा राखेर उनीहरुलाई उपचार सुरु गरिएको हो ।

कोरोनासँग मिल्दो जुल्दो लक्षण देखापरेपछि उनीहरुलाई आइसोलेसनमा राखिएको छ । जिल्ला स्वास्थ्य कार्यालय सिन्धुपाल्चोक प्रमुख दुर्गातत्त चापागाईका अनुसार उनीहरु हिजोदेखि स्वास्थ्य केन्द्रमा भर्ना भएका हुन् । उनीहरुको नमुना टेकु अस्पताल पठाइने र रिपोर्ट नआउँदा सम्म आइसोलेसनमै राखिने स्वास्थ्य कार्यालय प्रमुख चापागाईले बताए ।

गत माघ २७ गते इराकबाट फर्किएकी ३४ बर्षीया निमास्याङबो शेर्पा, उहाँको १७ बर्षीया छोरी याङगी शेर्पा र सोही स्थानका ८० बर्षीय छिरिङदोर्जे लामालाई सुख्खा रुघाखोकी लागेपछि बाह्रविसेस्थित प्राथमिक स्वास्थ्य केन्द्रको आइसोलेशन वार्डमा राखि उपचार सुरु गरिएको बाह्रविसे स्वास्थ्य केन्द्रले जनाएको छ ।

स्वाब संकलनका लागि स्वास्थ्य केन्द्रमा बिरामीको स्वाब राख्ने भिटिएम (विशेष प्रकारको किट) आइपुगेपछि संकलन गरिएको स्वाब परिक्षणका लागि टेकु अस्पताल पुठाइने जिल्ला स्वास्थ्य कार्यालय प्रमुख चापागाईले जानकारी दिए ।