धुलिखेल, २ चैतः काभ्रेको कोशीपारीमा पर्ने दुई पालिका जोड्ने झोलुङ्गे पुल बन्ने भएको छ । भुम्लु गाउँपालिका र चौरीदेउराली गाउँपालिका जोड्ने झोलुङ्गे पुलको आज शिलान्यास गरिएको हो । भुम्लु गाउँपालिका वडा नम्बर ६ कोलाती भुम्लु र चौरीदेउराली गाउँपालिका वडानम्बर ८ विर्ता देउरालीको खहरेखोलामा झोलुङ्गे पुलको निर्माणकार्य शुरु भएको भम्लु गाउँपलिकाका अध्यक्ष गुमान ध्वाजकुँवरले बताए ।

दुईओटा पालिका जोड्ने पुल बनेपछि बिर्ता देउराली र कोँलाती भुम्लुमा उत्पादन हुने गहुँ आलु जस्ता कृषिजन्य सामग्रीले राम्रो बजार पाउने अध्यक्ष कुँवरले बताए । पुल ८६ मिटर लामो हुने छ । झोलुङ्ग पुल निर्माणका लागि संघ सरकारको ३९ लाख २६ हजार २ सय ८५ रुपैया, भुम्लु गाउँपालिकाको २ लाख ७६ हजार ४ सय ३१ रुपैया र झोलुङ्गे पुल सहयोग इकाईबाट ३ लाख १२ हजार ३ सय २४ रुपैया खर्च हुनेछ ।

त्यस्तै स्थानीयको २ प्रतिशत श्रमदान अन्तर्गत ९२ हजार १ सय ४३ रुपैया गरी जम्मा ४६ लाख ७१ सय ८४ रुपैयामा निर्माण हुने सिभिक फोरमका झोलुङ्गे पुल फोकल पर्सन किरण गुरुङले बताए ।