धुलिखेल, २२ फागुनः काभ्रेको बेथान्चोक गाउँपालिकामा तीन वडा कार्यालयको नयाँ भवन बन्ने भएको छ । जिल्ला समन्वय समितिको ६० प्रतिशत अनुदान र पालिकाको बजेटले वडा कार्यालयको नयाँ भवन निर्माण हुनेछ ।

१, ३ र ४ नम्बर वडा कार्यालयको नयाँ भवन बन्न लागेको पालिकाका अध्यक्ष प्रेम बहादुर तिमिल्सिनाले जानकारी दिए । वडा नम्बर २ ले पहिलाकै भवनबाट सेवा प्रवाह गरिरहेको छ ।

५ र ६ नम्बर वडा कार्यालयको भने मर्मतका लागि बजेट विनोजन गरेको प्रमुख प्रशासकीय अधिकृत कृष्ण प्रसाद सापकोटाले बताए । वडा कार्यालयको नयाँ भवन निर्माणका लागि ६० लाख रुपैयाँ खर्च हुनेछ । नयाँ भवन दुई तल्ले र आठ कोठाको बन्नेछ । नयाँ निर्माण हुने र मर्मत हुने सबै काम चालु आर्थिक वर्षभित्रै सकिने प्रमुख प्रशासकीय अधिकृत सापकोटाले बताए ।

त्यस्तै चालु आर्थिक वर्षभित्रै पालिकाले १ र ३ नम्बर वडामा स्वास्थ्य चौकीको नयाँ भवन बनाउने भएको छ । ४ नम्बर वडाको भने मर्मत गरिनेछ ।

यसैबीच पालिकाले वडा नम्बर २ मा सामुदायिक पुस्कालय सञ्चालनमा ल्याउने भएको छ । त्यसका लागि नयाँ भवन पनि यसै वर्षभित्र बनाइसक्ने गरी काम सुरु भएको पालिकाले जनाएको छ ।