धुलिखेल, १८ फागुनः काभ्रेको महाभारत गाउँपालिकाले मंगलबार (फागुन २० गते) सार्वजनिक बिदा दिने भएको छ । गाउँपालिकाले आइतबार एक सुचना निकालेर मंगलबार माझी समुदायको पर्व लदी पुजाको अवसरमा सार्वजनिक बिदा दिने बताएको हो ।

फागुन १२ गते बसेको गाउँ कार्यपालिकाको बैठकले सार्वजनिक बिदा दिने निर्णय गरेको प्रवक्ता रविन मोक्तानले बताए । ‘सबै धर्म, संस्कृतिको सम्मान र संक्षरण गर्नु नै हामी सबैको दायित्व हो, प्रवक्ता मोक्तानले भने ‘लदी पुजा माझी समुदायले हर्ष उल्लासका साथ मनाउने भएका कारण सार्वजनिक बिदा दिने निर्णय गरिएको हो ।’

त्यसदिन पालिकाभित्रका सबै सरकारी कार्यालय, स्वास्थ्य संस्था, शिक्षण संस्था बन्द रहने छ । २०६८ सालको जनगणना अनुसार १८ हजार २ सय ८३ जनसंख्या रहेको पालिकामा माझी समुदायको जनसंख्या १ सय ९० रहेको प्रवक्ता मोक्तानले बताए । पालिकाका उपाध्यक्ष समेत माझी समुदायकै हुन् ।