धुलिखेल, १७ फागुनः सिन्धुपाल्चोक जिल्लाको सुकुटेमा महोत्सव सुरु भएको छ । सुकुटेमा शनिबार सुरु महोत्सवको नेकपाका अध्यक्ष पुष्प कमल दाहाल प्रचण्डले उद्घाटन गर्नुभएको हो । महोत्सव फागुन २० गतेसम्म चल्नेछ ।

सिन्धु पर्यटन व्यवसायी संघले आयोजना गरेको महोत्सवमा २० हजार पर्यटकले अवलोकन गर्ने बताइएको छ । महोत्सवमा तामाङ संस्कृति र झाँकी, नेवारी संस्कृति र धिमे बाजा, माझी समुदायको विशेष नाच र खैंजडी भजन आकर्षणका रुपमा राखिएको छ ।

त्यस्तै पालिका स्तरीय दोहोरी गीत, सिन्धुपाल्चोक र पर्यटन विषयमा पालिकास्तरीय वतृत्वकला प्रतियोगिता हुनेछ । लामोसाँघु–तामाखानी पदमार्गमा हाइकिङ, सुनकोशीमा र्याफ्टिङ प्रतिस्पर्धा समेत हुने सिन्धु पर्यटन व्यवसायी संघका अध्यक्ष नारायण श्रेष्ठले बताए । उनका अनुसार महोत्सवमा ५ करोडभन्दा बढीको आर्थिक कारोबार हुनेछ ।