धुलिखेल, १२ फागुनः काभ्रे जिल्ला मात्रै होइन देशका धेरै पालिकाका उपप्रमुखलाई गाडी चड्ने शोख भएको पाइन्छ । तर काभ्रेको रोशी गाउँपालिकाका उपाध्यक्षले भने आफ्नो लागि गाडी किन्न पालिकाले विनियोजन गरेको बजेटले एम्बुलेन्स खरिद गरेर स्वास्थ्य चौकीलाई दिएकी हुन् । उपाध्यक्ष लक्ष्मी बर्तौलाले दुई ओटा एम्बुलेन्स खरिद गरेर पालिकाभित्रका दुईवटा स्वास्थ्य चौकीलाई हस्तान्तरण गरिएको हो । ‘जब म गाउँ गाउँ पुगे, त्यहाँका नागरिकको दुःख सहन सकिन, उनले भनिन् ‘म सुविधा सम्पन्न गाडीमा चढेर बिरामी नागरिक चाँहि छटपटाई रहेको देख्न सकिदैँन ।’

उपाध्यक्ष बर्तौलाले पालिकाको विकतटालाई हेरेर वडा नम्बर ११ को भिमखोरी स्वास्थ्य चौकीमा बस्ने र वडा नम्बर ५ को सिसाखानी स्वास्थ्य चौकीलाई एम्बुलेन्स दिनुभएको हो । ‘पालिकाका धेरै जनता समयमै उपचार नपाएर समस्या भोगिरहनुभएको छ, मैले गाडी चढेको के गर्नु, उपाध्यक्ष बर्तौलाले भनिन्, जनप्रतिनिधि भनेको जनताको दुःख बुझ्नु पर्छ भन्ने लाग्यो, पालिकाले आफ्नो लागि गाडी खरिद गर्न दिएको रकमले एम्बुलेन्स किनेर स्वास्थ्य चौकीलाई दिए ।’

एम्बुलेन्सले रोशी गाउँपालिकाका साथै नमोबुद्ध नगरपालिका, महाभारत गाउँपालिका, तिमाल गाउँपालिका, सिन्धुलीको सुनकोशी गाउँपालिका लगायतका बिरामीलाई पनि सेवा दिन सकिने उपाध्यक्ष बर्तौलाको भनाई छ । ‘यो जुन, जुन स्वास्थ्य चौकीलाई दिएको छ, त्यहाँका नागरिकलाई मात्रै सेवा दिने होइन्, उनले भनिन्, ‘आवश्यकता अनुसार आसपासका पालिकाहरुमा पनि यो एम्बुलेन्सले सेवा दिने गरि ब्यवस्था मिलाइएको छ ।’