धुलिखेल, ६ फागुनः पनौतीको खोपासीमा मुख्य कार्यालय रहेको बिन्धवासिनी बचत तथा ऋण सहकारी संस्थाले २७ औँ स्थापना दिवस मनाएको छ । मंगलबार बनेपामा विभिन्न कार्यक्रम गरी बिन्धवासिनीले स्थापना दिवस मनाएको हो ।

राष्ट्रिय तथा अन्तर्राष्ट्रिय पुरस्कारबाट सम्मानित भएको यस सहकारीमा ३५ हजार ७ सय १० जना रहेका छन् । बाल बचत तर्फ ७ हजार ३ सय ७० जना रहेको सहकारीका प्रमुख प्रबन्धक केपी लामाले जानकारी दिए । बिन्धवासिनीले मंगलबारदेखि काठमाण्डौमा समेत सेवा कार्यालय सञ्चालनमा ल्याएको छ । योसँगै सेवा कार्यालयको संख्या ७ पुगेको छ । त्यस्तै सेवा केन्द्र पनि ७ वटा नै रहेको छ ।

स्थापना दिवसको अवसमा सहकारीले ४१ जना ऋणिलाई सहुलियत परिचयपत्र दिएको छ । त्यस्तै ३ जना दलित बालबालिकालाई छात्रबृत्ति दिइएको छ भने ५० जनाले रक्तदान समेत गरेका थिए ।

कार्यक्रममा बोल्दै राष्ट्रिय सहकारी महासंघ लिमिटेडका अध्यक्ष मिनराज कँडेलले सहकारीहरुको दीर्घकालिन विकासका लागि आफु सदैबको लागिरहने बताए । ‘सहकारी भनेकै गाउँ–गाउँमा छरिएका थोरै पैसालाई जम्मा गरेर त्यहिका सदस्यहरुको हितमा खर्च गर्नुपर्ने हो, सबै सहकारी संस्थाहरु सहकारीकै मर्म अनुसार चल्नुपर्छ, उनले भने ‘सहकारीकै कारण अर्थतन्त्र मजबुद हुदैँछ ।’