धुलिखेल, २८ माघः धुलिखेल उद्योग वाणिज्य संघको चुनाव नजिकिदै गर्दा वर्तमान अध्यक्ष मञ्जु कुमार कोजुले रातारात फर्जी सदस्य बनाएको सार्वजनिक भएको छ । स्रोतका अनुसार मञ्जु कुमार कोजुले उद्योग वाणिज्य संघका कर्मचारी र पधाधिकारीको मिलेमतोमा रातारात तीन सयको हाराहारीमा नयाँ दर्ता तथा नवीकरण सदस्य थपेको तथ्य बाहिरिएको हो ।

मञ्जु कुमार कोजुले कुनै पनि व्यवसाय नगरेका आफु निकट नेपाली काँग्रेस पार्टीका कार्यकर्ताहरुलाई सदस्य बनाएको पाइएको छ । आफुलाई काँग्रेस धुलिखेलको नेताको रुपमा चिनाउने कोजुलाई अघिल्लो निर्वाचनमा काग्रेँस धुलिखेल नगर समितिले नै असहयोग गरेको थियो । त्यो बेला पूर्व एमाले र पूर्व माओवादी सम्बद्ध ब्यवासयीहरुको सहयोगमा उनी अध्यक्षमा निर्वाचित भएका थिए । पदको लोभले गर्दा अहिले उनी पुनः काँग्रेसबाटै अध्यक्षको प्रत्याशी बनेका छन् ।

निर्वाचनमा मञ्जुलाई सहयोग गर्न नेपाली काँग्रेस काभ्रेले आफु समर्थित ब्यवसायीहरुलाई ह्वीप जारी गरेको पाइएको छ । मञ्जु कुमार कोजुले फर्जि सदस्य बनाउनका लागि उद्योग वाणिज्य संघ धुलिखेलको नाममा आफ्नो छोरा मनिष कोजुको नामबाट एकमुष्ट ४ लाख ११ हजारको चेक बैंकमा दाखिला गरेको स्रोतले जनाएको छ । सो चेक उद्योग वाणिज्य संघको नामबाट २०७६ साल माघ १७ गते शुक्रबार बैंक बन्द हुने अन्तिम समयमा दाखिला भएको पाइएको हो ।

त्यस दिन संघका कार्यालय सचिव कार्यालय आएका थिएनन । तर पनि कार्यालय सचिव र अध्यक्ष मञ्जु कुमार कोजु मिलेर कार्यालयको छाप समेत दुरुपयोग गरेको भेटिएको छ ।